Alahai Ninja Tok...(Versi Budak Minang)

               Alahai....masuk haghi Senin ni 11.07.2011, dah nak masuk minggu ko tigo Ninja Tok tosadai kek XL Motors Seromban. Problemnya Fuel Injector rosak. Bondo ni dah jadi maso haghi aboh laie (Father's Day). Maso tu Tok nak poie servis moto. Sampai jo kek kodai moto, Tok terus tutup enjin. Bilo pomen suruh tolak moto atas Tok cubo la start enjin. Jadi motor buleh start tapi enjin tak buleh idup. Pomen tu koba pasal petrol tak masuk.Ado masalah dongan fuel cock. Tah iyo ko idak tu. Dio godek-godek wayar bawah tank tu buleh lak start. Settle servis Tok terus balik. Lepas tu Tok tak pakai sangat moto tu. Setakat pakai dokek-dokek okay la tak ado masalah.
               Al kisah pada 1 Julai lalu Tok pun nak bawak moto tu nak poie kelas UITM petang. Pukul 2.30 petang Tok singgah dulu kek PPD Kualo Pilah ado hal. Bilo nak poie UITM jo, tetibo dio buek hal lak. Moto buleh start tapi enjin tak idup. Aahhh sudah! Tok cubo la godek-godek wayar bawah seat, tak yo jadi-jadi gak. Nak check wayar bawah tangki boghek lak tangki tu. Langsung Tok tipon XL Motor suruh dio ambik pakai lori. Tokey koba lori buleh ambik haghi Sabtu je. Tido la 1 malam moto Tok kek PPD Kualo Pilah. Tok balik tumpang kawan.
               Haghi Sabtu 2 Julai, lopeh ambik moto dongan lori, tokey XL check moto ado masalah dongan fuel injector. Dio pun call HQ Kawasaki, diorang koba stok dah habih. Kono tunggu 2 minggu laie baru dapek stok baru. Tah iyo ko tidak tu. Bilo tanyo berapo hargo fuel injector tu, dio kato dalam 7 ke 8 ratus hinggit. Humang aaii...mahal gilo tu! Nasib baik dalam waranti laie. Tapi boring la motor satu laie tak ado. Bilo Tok poie ziarah Ninja Tok kek XL Motors tu nasib baik la dio ado berteman. Bolah kanan ada kawan Cagiva 250. Bolah kiri ada lak bertemankan Modenas X-Cite. Okay la dio tak sunyi sangat. Sekarang ni kono harap kek Lagenda ZR Tok la nak jadi working horse Tok. Chehh..macam la Tok pakai sangat Ninja tu. Selamo ni pun moto Ninja tu pun bukan jalan sangat. Cumo sojak kelas UITM Tok bermulo kek Beting,Kualo Pilah tu, Tok perlukan Ninja tu. Nak berulang Kualo Pilah sebanyak duo kali memang tak larat pakai Lagenda ZR( Pagi poie sekolah, malam poie ngajar bebudak UITM tu.). Pakai keta buleh tapi parah kek minyak lak. Cik Ninja oooo cik ninja...bilo la ekau nak balik rumah ni?